Kirdkî.com Xirbanê xo ra bigêrîn, şênayîyê şarî ra megêrîn
Weşanxaneyê Peywendî ra kitabêko kirdkî vejîya. QEREBEGAN, Tarîx, Kultur, Coxrafya. Kitab hetê nuştoxe Pervîn Septîoglu ra nusîyayo.
Peynîya kitabî de wina nuseno: Tarîx, kultur û coxrafya semedê şinasnayişê yew şarî nîşaneyê erjaye yê. Na xebate xo de nuştoxe bi tarîx, kultur û coxrafya yew cayê muhîm ê zazayan dan şinasnayiş, Qerbegan yan zî bi nameyo bîn Mîyaran. Metodolojîyê xebate zî gelêk muhîm a. Zafê malumatê xebate fekê şarê Qerebegan ra ameyê girewtiş. Malumatê fekkî çimeyê yewin ê xebatanê îlmî yê. Na xebate de tarîx, coxrafyayê mintiqa ra heta ziwan, sonik, meseleyî, efsaneyî, werdê şarî ra ameyê vatiş. Merdim wexta ke nê rezan waneno vano qey şîyo Qerebegan û şarî de qisey keno. Heto bîn ra xebate semedê xebatkaranê kultur û ziwanî zî yew çimeyo muhîm o.
Pervîn Septîoglu kam a: Pervîn Septîoglu serrê 1979 di qezayê Erzûrim Xinûs di ameya dinya. Eslê xo Pali ra ya. Mektebo vêrîn, mîyanîn û lîse Erzûrim di wenda. Zewacê xu ra dima şîya Pali. Serrê 2013 di kewta îmtîhanê unîversîte. Unîversîteyê Çewlîgî di qisimê Edebîyat û Ziwanê Zazakî wend û bi yewinî qedêna. Dima 2017 qisimê Zazakî di lîsanso berz qezenc kerda û inkê zî tezê xu ser o xebat kena. Çend nuşteyê yê zî kovara Vîr di neşir bîyî. Ziwanê dayikî yê kurmancî yo. Zewacê xu ra pêy zazakî bonder bîya. Yew laj û di kênayê yê estî. Çewlîg di ciwîyena. Kovarê Unîversîteyê Çewlîgî di yew maqaleyê yê neşir bîya.
