Kirdkî.com Xirbanê xo ra bigêrîn, şênayîyê şarî ra megêrîn
W. Zozanî
Mudeyêko derg esto ke mi tubay nênuşt, ez binêkêk arisyawa. Hêvîyê mi na bî, mi vatên cîwan û xortê ma yê kirdan hinî dest bi xebata zazakî kerda û barê ma bîyo şenik. Sey cityeran û tirpançîyan ma qefelîyê bî û ma xo da bi kişt, binê yew darê valyerî. Ma va, wa refo bîno ke ma dima wo bîyoro ma bivîyero. La ma pabe vindertî nêvindertî çew bîyor çin o. Gelo ma xiyali dî, ma va refêko gird ho ma dim a. Henzar bar şikir ke ma rew bî hîşar û ma zana ke çew ma dim a nêno. Bar ma hewna ma rê mend. Ma panceyê xo şamarnayî we, tirpanê xo guret xo dest û ver kerd ci, ma hê ziratê xo çînenê, xo dim a zî nêewnîyenê. Hêvîyê ma ma dim ra çin a la xo wa ver esta, esta?
Vanê Mela Ehmedê Xasî rik ra Mewlido Kirdî nuşto. Meseleyê Osman Efendîyo Babijî eynî ya. Ey zî rik ra mewlidê xo nuşto. Yanî çewî, xo ver ra nêvato ma pê ziwanê xo binus. Gureyê ecebo ke nesla newe rik ra zî bo nênusena. No wext de fikrê miliyetperwerî vila bîyo, hîna zaf merdimê ke tede no fikir virazîyo, ê qiymet danê ziwan û kulturê xo. Pê ziwanê xo nusenê, wanenê û musenê. No çiyêdo baş û weş o. La çi heyf ke no fikir herkesî de peyda nêbeno. Ma zazayan de bin ra peyda nêbeno, ma nêzanî çi ra? Çi ciwanê ma çi xortê ma yê wende estê ez geno xo hete pê saetan ci rê vana vana vana… Ez vana, şima wende yê hişyar bîyên. Ê verînan nêzanên, qebahetê înan nêbi. La nesla newî wende ya, zana ya. Gera xo ver nê çîyan aqil biker û no bar wedar, serê paştî xo ya n’. La ti kamî ra vanê, kami eşnaweno. Her tim ma nêeşkenê însanê xo zixt biker. Gera merdim xo ver aqil bikero. Ez bê umud nîya. Labelê ez naye zaf hol zana ke hetan miyanê ma zazayan de fikrê hemberî miliyetperwerî nêvirazîyo, xîyreto milî ma de aya nêbo, ma hama zaf pey de manenê. Gelo no halê ma se beno şarê ma?
