Kirdkî.com Xirbanê xo ra bigêrîn, şênayîyê şarî ra megêrîn
Grûba Xebate ya Vateyî ke 18 serr a kirdkî ser a xebat kena emser kombîyayîşê xo ha Çewlîg de virazena û standarbîyayîşê kirdkî ser o xeylêk hizmetê grûbe est ê. Kirdkîya nuştekî de nika eserê ke hê ma dest de, ma eşkenî vajî ke se ra şeştî û hewtayî kedê na grûbe yo.
Rojnameyê Zazakî zî rojnameyêko safî bi kirdkî yo û aşme de reyêk Çewlîg de vejîyeno. Kesê ke no rojname vejênî Grûba Xebate ya Vateyî Germaw de zîyaret kerd.
No zîyaret de ewilî endamê grûbe xo dayî şinasnayîş û endamanê grûbe ra M. Malmîsanijî bi kilmî grûbe da şinasnayîş. Dima ekîbê Rojnameyê Zazakî xo da şinasnayîş. Badê cû Grûba Xebate ya Vateyî ra Munzur Çemî sey yew panelêk kombîyayîş îdare kerd û wina va: Ma Rojnameyê Zazakî pîroz kenî. No gureyo ke şima kenî zaf erjaye yo. Xebatê ma bineyna akademîk a û beno ke her kird eleqa nêmojno xebatê ma labelê sey Rojnameyê Zazakî rojnameyî, ziwanê ma hîna erzenî rojevê şarî ma. Ma semedê na xebate şima pîroz kenî û dewamê ci zî pawenî. Dima ekîbê Rojnameyê Zazakî ra Xalxizir, derheqê fikrê rojnameyî senî vejîya, çi pirsgirekî est ê û ekîbe senî nîya pêra ra behs kerd û wina dewam kerd: – Ez xebatê Vateyî ra xeberdari bî û ez kewta mîyanê xebatî û mi dî ke Vate raşta zî in guri zûna. Ekîbê Rojnameyê Zazakî ra Nîhad Çir zî va ke: Ez 1997 ra nat Vate ra xeberdar a û tim teqîb kena. Mi gore, senî ke tirkî de Turk Dîl Qûrûmû est a kirdkî de zî Grûba Xebate ya Vateyî est a. Ez şima hemin rê zaf zaf spas kena. 
Badê îkramanê Vateyî ya ekîbê Rojnameyê Zazakî kitabê kirdkî ke nuştoxê Vateyî newe vetê dayê îmzakerdiş.
No kombîyayîşê Grûba Xebate ya Vateyî de çewlîgijan ra Nuredîn Celalî, Seyîdxan Kurij û Doxan Karasû est bî û wayîrê keyeyî hesebîyênî, o rid ra zaf eleqe motî ekîbê Rojnameyê Zazakî.
