Kirdkî.com Xirbanê xo ra bigêrîn, şênayîyê şarî ra megêrîn
HAYIG
Mikail Aslan
Weşanê Famî
2013 Îstanbul, 88 rp.
Mikail Aslan bi nameyê “HAYIG” yew kitabo kirdkî nuşt. Mikail verê cû no kitabê xo tirkî-kirdkî nuşt bi. Na rey safî Kirdkî neşr kerd. Kitab, bi qesavêrîyê Kamer Söylemezî, weşanxaneyê Famî ra veciya. Hayig, 88 rîpelî ra yeno pê. Tede bi nameyê Hayig, Hayig û Zanox, Hadar, Hayig Sono Çime, Reqayisê Hewru Bihesne, Sayir, Pêtaga Kore, Çeşm-î Dil, Deryayê Bextîyarîye, Di Çemî, Kutik û Nîzam, Honik û Zarance, Perrê Sarî, Sirr Zirr, Tencik bi Çemçikî ra, Cîgera Maye, Dîna Gewre, Hewesê Domanî meseleyî estê . Kitab de hîrê hebî karakterî estê. Nînan ra yew Hayig yew Zanox yew zî Hadar (Haydar) o. Hayig manaya xo hayibîyayiş, ferqkerdiş û famkerdiş ra yeno. Rengo zerd Hayig o, aîdê dinyaya maddî yo. Rengo sûr Zanox o, rûh yan zî hîşê merdimî temsîl keno. Kewe zî Haydar o, merdimî hifz ken û paweno. Mikail, no kitabê xo de hîna zaf kulturê Dersîmî yo fekkî arêdayo.
Qesavêrî ra, “No kitav çîyode bîn kî onca ma rê keno eskera, ano verê çiman : Waxt û serrî mordemî kamil nêkenê. Eke hen bîyenê , Pasayî wusar îştane Dîna nêdenê û payîz peyser nêwastenê. Zaranca ke cisnê xo rê bîye felek û kutiko ke riskê cisnê xo seweta wayîrê xo sevekna, peynîye de alange de mendî. Yê zarance perrê xo şîkayî, yê kutik kî kuzayîsê xo caye de gulbang nêda. Çekuyê Mikailî raştîya ma wa xiravin û dezine anê ra ma vîrî. Onca kî waxto ke mordem no kitav waneno, çekuyê xo benê rama esqî vorenê çimanê mordemî ro. Germ û nerm.”
