Kirdkî.com Xirbanê xo ra bigêrîn, şênayîyê şarî ra megêrîn
Ezîz Gul, Dalpeya Cemedyeyên, Weşanxaneya Aram, Gulane 2013, 42 r.
Roj bi roj ma edebiyatê xo de kitabanê neweyan vînenê. No zî hêvîya ma keno zaf. Kitabê Ezîz Gul bi nameyê Dalpeya Cemedyeyên weşanxaneya Aram ra vejîya. Kitab de hîris û di hebî şîîrê kirdkî estê. Ezîz Gul kirdanê Erxenî ra û dewa Gisto ra yo. No kitab semedê kirdkîya Erxenî yew kerraya bingeyin a. Ma hêvî kenê ke sey ey hîna zaf xortê ma, ciwanê ma, ziwanê ma rê xizmet bikerê. Nê rojanê peyênan de kirdkî de yew herikîyayîş kuyeno çimanê ma ver a. Verê cû ma vatênî ziwanê ma ho sekerate de. Labelê pê nê kitabanê neweyan hêvîya ma zî bena newe. Nuştoxê nê kitabî pê yew vervateyo ke manaya xo zaf xorî yo dest bi şiîîranê xo keno.
No vervate ra qismek: “Zere, verî xo ordeg hesebneno dim ra gird beno û ewnîyeno ke pûrtê ey ordeg nêmaneno û fam keno ke kewmê (qewm) kergan ra ameyo û no halo raştîyên (raştiqîn) gineno mezgê ey ro. Mezgê Zere têmîyan keweno û xo rind nêhesebneno. Gedeyê kurdan sey wûçikê Zere mezgê xo de xo hesîyenê û gêrenê kewm (qewm) û ziwanê xo.”
Weşanxaneya Aramî hewê ewil a ke kitabeko kirdkî vejena. Ma hêvî kenê zêde bibî û ma hewna hêvî kenê ke xortê ma yê ke wayîrê huner û edebîyatî yê hinî pê ziwanê xo, kitabanê xo nusenê û xo ra dim nesla ameye rê verdenê.
