Kirdkî.com Xirbanê xo ra bigêrîn, şênayîyê şarî ra megêrîn
Çewlîg de rîdê vewre ra cehdeyî qefelîyayî, nêweşek dewe de mendî bi motorsîkletê vewre ameyî xelaskerdene.
Çewlîg de vewre zaf vara. Cehdeyî qefelîyayî. Nêweşî ke dewe de mendî bi motorsîkletê vewre yenî xelaskerdene. No hewte Çewlîg de cayanê berzan de yew metre ra zêder vewre vara. Rayîrê dewan qefelîyayî. Puk vera têlê cereyanî qerifyayî. Xeylêk cayan de cereyan çin o. Cehdeyî girewteyî û no sebeb ra nêweşî ke dewan de yî nêeşkenî xo birasnî nêweşxaneyan. Dewanê Çewlîgî ra Gorîz de yew xebera nêweşî ame. Ambulansî semedê ke cehdeyî girewteyî nêeşkayî şêrî dewe. Vewre o qeyde zaf vara ke greyderî zî kewtî rayîr la zafîya vewre ra cehde akerdiş xeylê kewt erey. Naye ser berpirsîyarî, xeber da komela gêrayîş û xelasnayîşî (AKUT). Endamê komela xelesnayîşî senî ke îxbar girewtî ca de terarekê xo dî û bimotorsîkletê vewreyî kewtî cehde. Nêzdîyê saetêk serê vewre ra mîyanê puk û pukelek de xo resna dewe. Dewe de nêweşî girewtî û nayî tawikê vewreyî ser a û agêrayî. Xeylêk zehmetan dima nêweş resnayî ambulans. Badê no nêweşî ya endamê komela xelesnayîşî semedê arisnayîşî ya amebî bînaya xo ke yewna xebera nêweşî ame. Na hewe nêweş dewa Emtaxî de bi. Nêweşê velgî ke gereke makînaya dîyalîzî ya kur o. Bê arisîyayîşî ya na hewe endamî rayîrê Emtaxî girewt û xeylêk zehmetan dima nêweşo bîn zî resnayî ambulans. Serekê komela gêrayîş û xelesnayîşî Ahmet Buzrul vat ke: Ma no hewte des hebî nêweşî xelesnayî. Ma zî goreyê xo semedê xelasnayîşê nêweşan masaya qrîzî na ro. Ça de hewceyîya ma bibo ma resenî ci înşallah. Semedê rizayê Homayî ya ma bi embazanê xo şaro ke tengasî de yo ma xelesnenî.
