Muftîyê Sêwregî Usman Esad Efendîyê Babij

MUFTÎYÊ SÊWREGI USMAN ESAD EFENDÎYÊ BABIJ

Wisif ZOZANÎ

Usman Esad Efendîyê Babij (1852-1929)

Usman Efendî serra 1268/1852 de Sêwregi de mehlaya Camîya Kebîrî de ame dinya. Babîyê ey Hecî Eyub Efendî yo. Eşîra ey dewa Bab ra ya. No rid ra ci rê vanê Babij. Mehemed Elî Ewnî zî sey ey eşîra Babî ra bi. Usman Efendî wendişê xo yo ewilîn û mîyanîn ra pey, şi medresa, Zulfîqar Zuhdî Efendî het derse wende. Serra 1874 de wendişê xo qedîna û serra 1881 de zî îcaze girewt. Serra 1884 de memuriyetê xo sey azayê mehkemaya ewîline yê qezaya Sêwregi dest pêkerd.

Badê mergê seydayê xo Zulfîqar Zuhdî Efendî, serra 1905 de tayîn bi muftîyîyê bajarê Sêwregi. Labelê yew mude cuwa pey beynateyê Usman Efendî û muteserifê (walî) Sêwregi xeripîya. Muteserif Cemal Ezmî beg serra 1909 û aşma sibate de walîtîya Dîyarbekirî ra wazîfe ra girewtişê Usman Efendî waşt. Walîtîya Dîyarbekirî semedê tehqîqatî ya yew heyet na ro. Heyetî, tehqîqat viraşt û semedê girewtişê Usman Efendî rê sebebêk nêdî. Heto bîn ra zî heyetî ca kerd ke heme şîkayetî ke virazîyay, pêroyê înan pê vateyê muteserifê bajarî virazîyayê. Naye ra pey Usman Efendî serra 1917 de payeyê Mexrecî girewt. Xeylêk serrî zî muftîyîya Sêwregi kerd.

Wexto ke Usman Efendî muftîyîye kerda no mohr şuxulnayo. Mohr de “Usman Esad bin Eyyub 1322 [1904]” nuseno

Usman Efendî semedê kirdkî xizemtêko pîl kerdo. No xizmetê ey nuştişê kitabê Mewlidê Dimilî yo. Usman Efendî wexto ke Sêwregi de muftîyîya bajarî kerdêne beynateyê ey û yewna alimê Sêwregîi Yusuf Samî Efendî de reqabet bibi. Şarê bajarî zî no waziyet zanaynî. Rojêk Yusuf Samî Efendî pê ziwanê Usmankî yew mewlid nuşt û çap kerd. No mewlid mîyanê şarê Sêwregi ra vila bi. Şar ame Usman Efendî het û wasfê mewlidê Yusuf Samî Efendî da. Naye ser o Usman Esad Efendî kewt zere û ey zî yew mewlid nuşt. Dima ra ame mîyanê şarî û va mi zî yew mewlid nuşto. Şarî va no çîyêko newe nîyo û huner nîyo. Usman Efendî va, Yusuf Samî efendî yew ziwano ke tede cuwa ver zî kitabî ameyê nuştiş o ziwan de nuşto. Labelê mi o tewir yew ziwan de nuşto ke verê cû tu eserêk pê nê ziwanî nêamo nuştiş. Hunerê mi no yo. No mewlidê Usman Efendî weşiyê ey de nêame çapkerdiş. Labelê çar serrî badê mergê ey pê destê Celadet Alî Bedirxanî serra 1933 de ame çapkerdiş. Usman Esad Efendîyo Babij, 24 adare serra 1929 de şi rehmet. Homa rehme bero ey ser.