Kirdkî.com Xirbanê xo ra bigêrîn, şênayîyê şarî ra megêrîn
Wezîrê perwerdeyê milî yê Tirkîya Umer Dînçer zaningehê Çewlîgî de va: Serrnê ma zazakî sey yew lehçe ney, sey yew ziwano cîya hesebnênî û goreyê ey ma hereket kenî.
Semedê roja çewlîgijanê dinyayî ya wezîrê perwerdeyê milî yê Tirkîya Umer Dînçer ame Çewlîg. Çewlîg de 12.12.2012 ke çend tenan xo sere ra îlan kerd ke na roje, roja çewlîgijanê dinyayî ya. Na roja pîrozî(!) ver a bi paştdayîşê vîlayetê Çewlîgî ya yew qonser seba şarî, yew şewa şênayişî, akerdişê kitabxaneyê zanîngeha Çewlîgî û zaningehê Çewlîgî de yew panel ame organîze kerdene.
Qonsero ke seba şarî ya ameyo organîze kerdene Çewlîg de qewşaxê PTT’de bi. Qonser de deyîrvananê çewlîgijan ra Maral, Îbrahîm Musaoxlu û Servet Kocakaya deyîrî vatî.
Dima kitabxaneyê zaningehê Çewlîgî destê Umer Dînçer’î ra bi çepikan ame akerdene.
Şewe zî bînaya Merkezê Çandî(Kultur) de semedê TRT 6’î yew bername(program) virazîya. Bername de lawikî ameyî vatiş û kesê ke ameyî silayîkerdene pêro pîya govend girewt. Şewe de mebusê Çewlîgî wezîr Cevdet Yilmaz, qey xatira na rojî yew mêşna rê diwês hebî zerdî kerdî pa.
A şewe wezîrê perwerdeyî Umer Dînçer, tesîsanê zanîngeh de ame misafirkerdiş.
Roja bîn zaningehê Çewlîgî de yew panel virazîya. Panel de Umer Dînçer va ke: Ma wexto ke dersa zazakî kerdênî hedre ma zazakî yew versîyonê Kurdî fîkîrîyê. Hîna rastê ci ê ke kitab kerdê hedre, ê o tewir fîkîrîyêbî. Ma zî pisporîya eyin rê bawerîya xo ardibi. La serra bîn ma wexto ke kitabanê dersî nuşt, ma zazakî sey yew versîyonê Kurdî ney sey yew ziwano cîya anî şima ver.
Ma zî wezîrî, seba nê qalanê girdan rexne kenî û vanî ke destanê xo miletê ma ser ra biancîn.
Vîdeo: http://www.youtube.com/watch?v=9z2J8d1Tvsw
