Spasî

Kirdkî Çewlîg De Zîl Da…

Na roje ra çend aşmî cuwa ver Çewlîg de yew kursê kirdkî bibî a. No kurs, hetê berpirsîyarê kovara Vateyî yê Dîyarbekirî mamosta Mehmud Nêşite ra ame bi dîyene.

Hewte de di rojî mamosta Mehmud, bi ê serranê xo ya Dîyarbekir ra amênî û şewêk Çewlîg de manênî ke çewlîgijî ziwanê dayika xo rast binusî, biwanî û fehm bikerî.

Xora serrê ci estî. Rojê bibî nêweşbi zî ancî çewlîgijan erd de nêverdênî. Amênî kursê xo dênî.

Kurs, bi hewayo demokratîk, bi feknermî, zerra hîrayî û bi sebir vîyarna. Ma zaf çî tira musayî. Her çî ra zafêr, ma weşî, rindî û dewlemendîya ziwanê xo musayî.

Wexto ke kursê ma dest pêkerdibi mamosta sîteya dersiminfo.com’î de vatibi ke Kirdkî Çewlîgî de zîl dana.

Ma zî nika bi zerrweşî eşkenî vaje kî Çewlîg de kirdkî zîl da. Hetta bîya yew vila qijkek. Na zî sîteya ma www.kirdki.com’a.

Ma şexsê mamosta Mehmud Nêşite de kedkarana ziwanê ma rê bîlhessa Gruba Xebate ya Vate’yî rê spas kenî.

Komîsyonê Sîteya Kirdki.com