Kirdkî.com Xirbanê xo ra bigêrîn, şênayîyê şarî ra megêrîn
Tİ SE KENî?
Tewir tewir persan kenî, heridyênî, hêrsan kenî
Kalmeyê xo hesan kenî, gurey dişmen asan kenî
Ti korkanî reye şinî, espar bêrî peye şinî
Bê ban û bê keye şinî, werrey xo pêxasan kenî
Ne sereyî ser ban esto, ne sifreyî ser nan esto
Ne serwet û saman esto, gerrey mor û mêsan kenî
Virsîyê xo ra tersenî, çew ra tawê nêpersenî
Dema k’ cîfê xo pêsnenî, gazî dost û nasan kenî
Ek’ wazenî şeri aver, qey ti ling erzenî ma ver?
Vate haziran ra teber, paştgirî teresan kenî
Homa zalim ra heyf geno, bê şimşêr û bê seyf geno
Mezlum peynî de keyf keno, ti qalan abesan kenî?
Merdimîn wa ziwan nerm bo, wazen kêz bo, wazen kerm bo
Ganî bo yan zî sey term bo, wayîrî bêkesan kenî
Merdimîn-Nîsane-2011
